[东方报]世冠盃：河床搶韁半大夠和味[06-17]

世冠盃E組，阿根廷勁旅河床對日職浦和紅鑽。河床近況甚佳，各項賽事17場不敗，上月6場成績為4勝2和，只要保持走勢，世冠盃首戰坐和望贏，反觀浦和紅鑽近況回落，防守力不足更係大問題，留意到河床踢法搶韁，近8場7次半場開2球或以上，1.5球半場大有成2.8倍，認真和味。（周三凌晨3時開賽）

出戰世冠盃前夕，河床官方宣布17歲天才中場馬斯坦奧奴今夏轉投皇家馬德里，轉會費5,200萬美元（約4.05億港元），簽約5年，不過合約去到8月先生效，世冠盃將會係馬斯坦奧奴喺河床嘅告別演出，據報河床球迷對於會方過早出售馬斯坦奧奴非常不滿，而唯一能夠安撫球迷情緒，就係喺世冠盃爭取好成績。

除咗有呢位天才球星助陣，河床近況實在出色，近17場包括阿甲、南美自由盃同阿根廷盃，錄得9勝8和上佳成績，聯賽位居前列，自由盃分組賽亦首名晉級16強，佢哋往往喺開賽早段就發動攻勢，經常喺上半場就開出大比數，值得捧場客留意。

浦和紅鑽飄忽防守弱
浦和紅鑽今季回勇，喺日職處於領先集團，於4、5月份曾踢出5連勝走勢，不過近期無以為繼，近7場僅得2勝，而且7場僅得1場保持清白，相信難以抵禦河床強攻，而且好大機會上半場就失守，開出半場大機會甚高。