[东方报]世冠盃：世冠盃4強Show 富明尼斯當車仔冇到[07-08]

世冠盃4強大戰，富明尼斯對車路士，富明尼斯係今屆世冠盃僅存嘅南美洲球隊，有一定地利優勢，佢哋上輪8強淘汰希拉爾，晉級過程較為輕鬆，球員保留更多體力應付今場大戰，加上隊長堤亞高施華倒戈熟晒路，隨時搵到着數；至於車路士分組賽輸過畀法林明高，今仗難言穩勝，富明尼斯今屆5場世冠盃3勝2和未輸過，受讓半一必捧下盤。（周三凌晨3時開賽）

富明尼斯以2023年南美自由盃冠軍身份獲得世冠盃資格，雖然近年喺巴甲成績一般，但今屆賽事表現屬4支巴甲球隊中最穩定一隊，同一眾崇尚進攻嘅巴甲球隊最大差異，就係佢哋防守極之嚴密，今屆5場有3場保持清白之身，包括分組賽悶和多蒙特同馬姆洛迪辛當斯0比0，同埋16強2比0淘汰國際米蘭，連同之前喺巴甲同南美球會盃嘅近期成績，已保持11場不敗，共獲8勝3和，當中6場不失球，後防固若金湯，車路士要攻破呢條鐵桶防線絕唔容易。

藍戰士鋒線冇默契
車路士今屆表現慢熱，而且同巴甲球隊特別有緣，分組賽曾以1比3不敵巴甲「1哥」法林明高，上輪8強對另一班霸級勁旅彭美拉斯，要靠末段對方「擺烏龍」先險勝2比1，可見佢哋對巴甲球隊並無必勝把握，而且「藍戰士」主帥馬利斯卡對於新球季陣容仍然喺摸索階段，中鋒利安戴納已經取代尼高拉斯積遜，但又要同新加盟嘅祖奧柏度建立默契，整體攻力未必能夠完全發揮，要攻破防守力超強嘅富明尼斯就更加困難，今場極可能要打加時，甚至互射12碼分勝負，一於捧下盤。